مــــا أفــيدك..للشاعر عريان السيد خلف

ما افيـدك


ياليعـز دمعك ..شلك بدموع عينـي..
اتريــد ازيـدك؟

لاتوّصـي الناس واتكلـف كَلب
تعبان..كفارة بريدك..
لا تذوّب شمعة العشرين..
والعشرين جالزنجيــل بيدك..

لا تحـط نفسك شكَص نوجات..
وانت احجاية العاذل تصيــدك ..
لا تحط كَلبك على الصوبين كل وصله بكتــر واتكَول : اريدك

يالشلت كَلبي..أو لضمت الخيط..
بجروحــه..اعلـه جيدك

يا التظن..حسنك ملك..
عالناس والوادم عبيدك

ما أفيدك

آنه راضي ابحالتي أو حالك..عِله ويصعب مناله

مغتر..أو طبعك أعوج..متصلب أو يتعِب عدالــه

انتـه دمعك بالمثاقيل انشره..أو دمعي إليهــل..محـد بحاله

انتـه عنبـر ..آنه صم ادنان..وانباع ابرخـص ، محـد بحالــه..

يالسكن وسط الكَلب..وايروك متغاوي ابدلالــه

انتـه فالـه..ركشت ابكَلبي..
اولجت نابين..واكَعدها الدهر للجنة اجماله

وأصبرت راضي ابعذاب الروح..
والسكته..اصبحت ويـأي حــاله

يلي جامع بين طبع الذيب..
وأوصاف الغزالــه..

حلو ..أو عادات الحلو..من كثـر ما يغتــر..
يحط لوله ابجماله

ماله وكتي أو ياي..ورطني ابعشكَـ جذاب...مالــه؟؟؟

شفج..بس ابدفكة الدمعات..
خلاني اعلــه بالــه..

جالغريج الجرته الخوره..لغميج الماي..
واتعذر نتالــه

يلي جنت اوياه..متساوي السهم..
والوكت حطني..اوراح شالــه..

اتـنزت روحي..أو صفت تعرض عن اسمك..
ما تريدك

يالعلى اشفافك تحـط بسمه أو نصل سجيــن بيدك..

يالحسرتي اتونسك..ومجاذب الحسرات عيدك

ما افيدك..ما افيدك

ما افيـدك